Forumi i Shoqatave Shqiptare në Britani festoi 12-vjetorin e Pavarësisë së Kosovës

Mbrëmja festive u organizua dje nga Forumi i Shoqatave Shqiptare në Britani për 12-vjetorin e Pavarësisë së Kosovës

Anëtarja e Këshillit Koordinues të Diasporës, Brikena Muharremi, ka qenë pjesë e disa aktiviteteve kulturore të organizuara me diasporën shqiptare në Britaninë e Madhe. Një ndër aktivitetet ku ajo ishte pjesëmarrëse është mbrëmja festive e organizuar dje nga Forumi i Shoqatave Shqiptare në Britani për 12-vjetorin e Pavarësisë së Kosovës, shkruan albinfo.ch.

Ajo është shprehur shumë e gëzuar për këtë aktivitete që shërbejnë në ruajtjen e kulturës së mirëfillt shqiptare.

“Komuniteti ynë në Britani të Madhe javën e kaluar festoi Pavarësinë e Kosovës me një numër aktivitetesh. Ishte kënaqësi të marr pjesë dje në aktivitetin e organizuar nga Forumi i Shoqatave Shqiptare në Britani. Në fjalimin tim si përfaqësuese për Britani të Madhe në Këshillin Koordinues të Diasporës falemnderova Forumin që bëri bashkë komunitetin me këtë organizim. Thashë se ne festojmë një rrugëtim që Kosova bën si shtet si rezultat i shumë sakrificave jo vetëm të popullit tonë por edhe të popujve tjerë që kontribuan për lirinë tone”, u shpreh Muharremi.

Po ashtu ajo shtoi se për gjitha këto aktivitete është krenare dhe shprehet falenderuse nga shoqatat për organizimin e tyre.

“Shtova se jemi krenarë që tani festojmë të lirë duke dëshmuar veten si komb i cili ka aq shumë për t’i dhënë botës. Gjithashtu falemnderova të gjitha shoqatat në Britani dhe kudo në botë për punën që bëjnë për të promovuar kulturën tonë dhe për të ruajtur identitetin tonë”.

“Ndërkohë më 12 shkurt ishte kënaqësi të marr pjesë në koncertin me muzikë klasike të organizuar nga Ambasada e Kosovës në Londër ku artistë kosovarë me në krye mezosopranon e suksesshme Besa Berberi shkëlqyen me performancat e tyre. Falemnderoj Ambasadën për ftesën dhe për një mbrëmje të mrekullueshme”, tha ajo. /Albinfo.ch.

 

 

---