BE-ja rrit buxhetin për ta rindërtuar ekonominë pas pasojave të pandemisë

Udhëheqësit e Bashkimit Evropian janë pajtuar të krijojnë një fond prej të paktën një trilion euro për ta rindërtuar ekonomitë rajonale të shkatërruara nga pandemia e COVID-19.

Sipas udhëheqësve të BE-së, ky fond do të jetë i mjaftueshëm për ta luftuar krizën.

“Ky fond do të jetë me një madhësi të mjaftueshme, të synuar drejt sektorëve dhe pjesëve gjeografike të Evropës që janë më të prekura dhe do t’i kushtohet trajtimit të kësaj krize të paparë”, thanë udhëheqësit e 27 vendeve, përcjell Telegrafi.

Krerët e qeverive të BE-së kërkuan nga zyrtarët në Komisionin Evropian që të paraqisnin propozime të hollësishme “urgjente”, duke adresuar se si fondi i rimëkëmbjes do të lidhet me buxhetin e bllokut për 2021-2027.

BE-ja po planifikon të zgjerojë buxhetin e saj nga rreth 1.2 për qind e Prodhimit të Brendshëm Bruto në 2 për qind të Prodhimit të Brendshëm Bruto dhe më pas të përdorë ato fonde shtesë si një garanci për të marrë hua me kosto të ulëta nga tregjet financiare.

---