Me 31.7 gradë, sot u shënua dita e parë me vapë për këtë vit në Zvicër

Rekordi është shënuar në Chiasso. Në qytetin që ndodhet në kufi me Italinë u mat temperatura deri më tani rekorde, 31.7 gradë

Dita e parë zyrtare me vapë për këtë vit është regjistruar sot, në Ticino. Në Cadenazzo TI temperatura ishte ngritur mbi 30 gradë në mesditë, ka raportuar shërbimi i motit SRF Meteo në Twitter.

Në orën 13 të pasdites sipas MeteoSwiss, temperatura ishte tashmë 31.2 gradë po në Cadenazzo, transmeton albinfo.ch. Ndërsa rekordi është shënuar në Chiasso. Në qytetin që ndodhet në kufi me Italinë u mat temperatura deri më tani rekorde, 31.7 gradë.

Temperaturat në Rrafshnën Magadino dhe në Ticinon jugore ishin përgjithësisht dukshëm mbi pragun e njohur “të vapës” prej 30 gradë.

Në veri të Gothardit, gjegjësisht në Zvicrën gjermane dhe atë frankofone, krahas diellit sot ka pasur vogël edhe re të vogla dhe ca shi, përcjell albinfo.ch. Në mesditë temperaturat ishin 19.6 gradë në St. Gallen, 21.7 gradë në Bernë dhe 24.5 gradë në Lozanë. Në Sion është matur temperatura prej 25.2 gradëve.

---