Zvicra renditet ‘vendi i tretë më i mirë në Evropë’ për fillimin e një biznesi

Tomek Baginski Avatar of user Tomek Baginski Tomek Baginski @tombag

Në një studim të ri janë renditur vendet më të mira evropiane për fillimin e një biznesi në vitin 2020, ku Zvicra u rendit në vendin e tretë, pas Gjermanisë dhe Britanisë së Madhe, shkruan thelocal.ch, përcjell albinfo.ch.

Studimi i kryer nga një firmë e vlerësimit të konsumatorëve me qendër në Londër, NimbleFins, renditi 31 vende evropiane bazuar në kategori të tilla, si Shëndeti Ekonomik, Kostoja e Të Bërit Biznes, Klima e Biznesit dhe Cilësia e Fuqisë Punëtore.

Për të përcaktuar renditjen, NimbleFins analizoi të dhëna nga Banka Botërore, Forumi Ekonomik Botëror, Organizata për Bashkëpunim Ekonomik dhe Zhvillim (OECD), Organizata Arsimore, Shkencore dhe Kulturore e Kombeve të Bashkuara (UNESCO) dhe konsulta të ndryshme tatimore.

Sipas studimit, “Zvicra ka rezultatin më të lartë për shtrirjen e aftësimit të stafit dhe cilësinë e formimit profesional, për të mos përmendur përqindjen e dytë më të lartë të njerëzve që kanë arritur një arsim terciar”.

Sidoqoftë, Zvicra është “një nga vendet më të shtrenjta për të filluar një biznes për shkak të kostove të larta të jetesës dhe pritjeve për paga”, zbuloi studimi, përcjell tutje albinfo.ch.