Andi Zeqiri, te Kosova apo Zvicra?

Sulmuesi shqiptar po kërkohet nga të dy përfaqësueset

Një nga futbollistët më të talentuar shqiptar është Andi Zeqiri. Babai i tij, Avdili, ka konfirmuar për Super Sport Kosova se është afër kalimit në Brighton, që garon në Premierligën angleze.

Megjithatë, e ardhmja e tij me Përfaqësuesen mbetet e paqartë. Babai i tij ka thënë se pritet të kalojë te Kosova, ashtu si edhe presidenti i Federatës së Futbollit të Kosovës, Agim Ademi, shkruan albinfo.ch.

Por, në Zvicër janë të bindur se ai do të vazhdojë me Nati-n. Kujtojmë se Andi luan për Zvicrën U-21.

Agjenti i Zeqirit, Michel Urscheler, kundërshtoi deklaratën e babait të lojtarit përmes një njoftimi për shtyp.

“Agjencia Gold Kick SA dëshiron të konfirmojë se lojtari Andi Zeqiri, me nënshtetësi zviceran dhe kosovar, i ka dërguar një letër vëmendje federatës zvicerane të futbollit në të cilën ai konfirmon se dëshiron të vazhdojë të luajë me fanellën e Zvicrës siç ka bërë deri më tani. Kjo duhet t’i japë fund thashethemeve dhe informacioneve të ndryshme që qarkullojnë rreth tij”, ka thënë Urscheler.

Nga Federata e Futbollit të Zvicrës është konfirmuar se Andi Zeqiri, ka shprehur dëshirën që të luajë edhe më tutje për Zvicrën.

“Ne jemi rregullisht në kontakt me Andi Zeqirin. Ai sot na ka kumtuar se edhe mëtutje dëshiron të luajë për Zvicrën. Ai e ka bërë këtë deri më tash me shumë kënaqësi dhe vullnet. Ne në këtë kohë, ku ka pasur deklarime tjera për të ardhmen e tij, do ta mbështesim dhe shoqërojmë, siç e kemi bërë deri më tash”, ka thënë drejtori i përfaqësueseve të Zvicrës, Pierluigi Tami, raporton “Blick”.

---