Dy kantone kërkojnë ndihmën e ushtrisë në luftimin e koronavirusit

Dy kantonet në fjalë janë Gjeneva dhe Fribourgu. Këshilli Federal do ta diskutojë këtë në takimin e tij të jashtëzakonshëm

Ushtria Zvicerane ka marrë një “kërkesë për mbështetje” nga dy kantone të Zvicrës perëndimore (frankofone) në luftën kundër përhapjes së koronavirusit.

Këshilli Federal do ta diskutojë këtë në takimin e tij të jashtëzakonshëm që po vazhdon të mbahet edhe në këto çaste.

Zëdhënësi i ushtrisë Daniel Reist ka konfirmuar për mediat informacionin e publikuar fillimisht nga gazeta “Tages-Anzeiger”.

Sipas gazetës, dy kantonet në fjalë janë Gjeneva dhe Fribourgu, transmeton albinfo.ch.

Gjatë valës së parë të pandemisë, në pranverë, deri në 6,000 anëtarë të ushtrisë ishin mobilizuar për të mbështetur kantonet dhe kufijtë. Ata kanë realizuar rreth 320.000 ditë shërbim si pjesë e misionit Corona.

---