Kjo komunë zvicerane heq taksat për banorët

Se çfarë do të thotë kjo, ja një shembull: Letërnjoftimi, normalisht kushton 65 franga për të rriturit dhe 30 franga për të miturit

Letërnjoftimi falas, dëshmia e të dhënave personale falas: komuna Brislach në kantonin Baselland nga viti 2021 do të heqë taksat për banorët e vet, duke bërë kështu një akt unik në Zvicër

Se çfarë do të thotë kjo, ja një shembull: Letërnjoftimi, normalisht kushton 65 franga për të rriturit dhe 30 franga për të miturit, shkruan 20 minuten.

Sipas një njoftimi për media që komuna ka shpërndarë të mërkurën, edhe pagesa për të aplikuar për autoshkollë ose konfirmimi i të dhënave personale për kompanitë e sigurimeve nuk duhet të kushtojnë më asnjë rapi.

“Është e bezdisshme që akte zyrtare si këto janë ende të nevojshme në ditët e sotme”, shkruan komuna, transmeton albinfo.ch. Kjo është arsyeja pse këshilli lokal ka vendosur të heqë taksat që nga 31 dhjetori i këtij viti.

Megjithëse në këtë mënyrë komuna humbet të ardhura vjetore prej 8.000 deri në 10.000 franga, ajo ka vendosur t`u ofrojë banorëve “një të mirë unike”.

Në të kundërt, taksat stimuluese duhet të vazhdojnë të paguhen, siç është ajo për grumbullimin e  e mbeturinave.

Kancelaria Federale jep pëlqimin për letërnjoftim falas

Duke qenë se pagesa e vetëm disa prej taksave është në kompetencë të bashkisë, komunarët nuk ishin të sigurt se si është puna me letërnjoftimet.

Për këtë arsye ata fillimisht i janë drejtuar kantonit dhe më pas Kancelarisë Federale, përcjell albinfo.ch. Në Bernë, ata më në fund morën dritën jeshile, thonë në komunë. Këshilli bashkiak nuk është në dijeni që ndonjë komunë ose qytet tjetër në Zvicër të ketë ndërmarrë një hap të tillë si në Birslach.

“Në vitet e fundit ne si komunë kemi regjistruar disa llogari pozitive,” thotë kryebashkiaku Hannes Niklaus. Prandaj deshëm t’i jepnim diçka në kthim popullatës, pa ulur taksat.

Për më tepër, sot shumë gjëra bëhen në internet, kështu që puna që merr përpilimi i faturave ndonjëherë është më e madhe se përfitimi prej tyre, përcjell albinfo.ch. “Kështu, ne po e bëjmë një të mirë për vete dhe në të njëjtën kohë po përfitojnë të gjithë”, thotë Niklaus.

---