Vaksinimi në Gjermani nis në ditët e para të janarit

KEYSTONE/EPA/JOHN THYS / POOL

Së fundmi, shefi i stafit të kancelares gjermane, Angela Merkel, tha se pret që vaksinimi kundër koronavirusit në Gjermani të nisë në ditët e para të vitit të ardhshëm, transmeton albinfo.ch.

Autoritetet e Bashkimit Evropian pritet që deri më 29 dhjetor të marrin vendimin për miratimin e vaksinës së parë për përdorim.

Tashmë, Gjermania është duke përgatitur qendrat e vaksinimit.

Shefi i stafit të Merkelit, Helge Braun, i cili edhe vetë është mjek, tha për gazetën Bild se është i gatshëm t’i ndihmojë autoritetet mjekësore.

Po ashtu, Braun tha se ai dhe kancelarja Merkel do të vaksinohen “kur t’u vijë radha”.

Ndërkohë, shifrat e infektimit në Gjermani janë stabilizuar pak a shumë në një nivel të lartë, prejse ka nisur izolimi i pjesshëm, më 2 nëntor.

Të hënën, autoritetet shëndetësore raportuan për 12.332 raste të reja me koronavirus.

Masat kufizuese, të tilla si mbyllja e restoranteve, bareve dhe objekteve sportive, pritet të zgjasin së paku deri më 10 janar.

Braun tha se duhen kufizime më të rrepta “së paku në vatrat” e shpërthimit të koronavirusit. /Rel/Albinfo.ch