Lajme

Nga shtatori 2022 në Zvicër nuk do të ketë më fletëpagesa si kjo

Deri më 30 shtator 2022 edhe më tutje pranohen të dy mënyrat e pagesës. Pas kësaj date në vend të fletëpagesës klasike do të përdoren faturat QR dhe fatura elektronike

E mërkurë, 20 Janar 2021 - 15:20 albinfo.ch

Historia e fletëpagesës së njohur për të gjithë në Zvicër, së shüejti do t`i takojë të kaluarës. Tashmë është vendosur: Mënyra e pagesës me fletëpagesë përfundon më 30 shtator 2022.

Postfinance do të pranojë edhe më tutje të dy mënyrat e pagesës deri më 30 shtator 2022, shkruan 20minuten.ch. Pas kësaj date në vend të fletëpagesës klasike do të përdoren faturat QR dhe fatura elektronike, thuhet në një komunikatë të lëshuar nga Postfinance

Institucionet financiare zvicerane tashmë kanë adaptuar zgjidhjet e tyre mobile dhe ato e-banking në mënyrë që të mundësohet pagesa dixhitale me faturën QR për klientët privatë dhe ata të korporatave, transmeton albinfo.ch.

Ata që ende preferojnë të paguajnë në sportel, përsëri mund ta bëjnë këtë me faturën QR. “Në të vërtetë asgjë nuk ndryshon për paguesin e faturës”, thekson për gazetën, një zëdhënës i Postfinance. Fatura (fletëpagesa) do të duket ndryshe në të ardhmen, por mund të paguhet njësoj si më parë.

Fatura klasike e pagesës përdoret ende gjerësisht në Zvicër: në vitin 2019, Postfinance kishte regjistruar 713 milionë transaksione të kryera me fletëpagesën e kuqe dhe atë ngjyrë portokalli, përcjell albinfo.ch. Edhe në vitin 2020 shifrat e transaksioneve duhet të kenë qenë në nivel të ngjashëm, por ato nuk janë ende publike.

Heqja e fletëpagesës ka për qëllim të kontribuojë në dixhitalizimin e transaksioneve të pagesave. Me faturën QR dhe faturën elektronike, Grupi “E Six” synon të përmbushë kërkesat e rritura të proceseve të automatizimit. Për kompanitë që nuk janë marrë ende me mënyrat e reja të pagesës tani është koha e fundit që ta bëjnë këtë.

Fatura QR është në dispozicion që nga qershori

Fatura QR është prezantuar për herë të parë më 30 qershor 2020. Ajo përbën standardin e ri për faturimin me shkrim në Zvicër. Siç sugjeron dhe vetë emri, ka një kod QR në faturë. Kodi përmban të dhënat për faturën në formë dixhitale.

Lexoni po ashtu:

https://www.albinfo.ch/sa-firma-te-shqiptareve-jane-krijuar-ne-zvicer-2013-2020/