Itali: Personat që e kanë kaluar Covid-19 do të marrin vetëm një dozë të vaksinës

Njerëzit që kanë kaluar tashmë koronavirusin në Itali do të marrin vetëm një dozë, në vend të dy dozave që merren zakonisht, ka njoftuar Ministria italiane e Shëndetësisë.

Politika e re do të zbatohet për njerëzit që janë infektuar 3 deri në gjashtë muaj më parë, para se të vaksinohen, raporton BBC, përcjell Albinfo.ch.

“Një dozë e vetme e vaksinës mund të konsiderohet për individët me infeksion të mëparshëm SARS-CoV-2, simptomatik ose asimptomatik”, tha ministria.

Rreth 4.7 milionë doza janë administruar deri më tani në Itali. Dhe vetëm 1.5 milion persona kanë marrë dy doza në vendin me 60 milionë banorë.

Franca dhe Spanja prezantuan të njëjtën qasje muajin e kaluar.

Sipas ekspertëve të shëndetësisë, njerëzit që kanë kaluar Covid-in kanë krijuar imunitet nga virusi. Një dozë e vetme do të shërbente si një përforcues i këtij imuniteti.

Vendimet vijnë në kohën kur shumë vende europiane po përballen me mungesa të furnizimeve të vaksinave.