Italia bllokon eksportin e ngarkesës së vaksinave drejt Australisë

Keystone (University of Oxford/John Cairns via AP)

Qeveria italiane ka bllokuar sot eksportin e një dërgese me vaksina anti-covid drejt Australisë nga AstraZeneca. Vendimi ka të bëjë me 250,000 doza të vaksinës të prodhuara nga impianti i AstraZeneca në Itali.

Lajmi vjen në një kohë replikash mes zyrtarëve të BE dhe kompanisë prodhuese, e cila ende nuk ka arritur të prodhojë masën e kërkuar nga shtetet anëtare, transmeton Euronews, përcjell Albinfo.ch.

Sipas skemës evropiane të vaksinave, të caktuar prej qershorit të shkuar, unioni ka negocjuar blerjen e vaksinave për llogari të te gjitha vendeve anëtare.

Organizata Botërore e Shëndetësisë ka paralajmëruar prej muajsh një fushatë kundër “kërcënimit të nacionalizmit të vaksinave”, duke thënë se “askush nuk është i sigurt derisa të gjithë të jenë të sigurt”.

Sidoqoftë, mungesa globale e dozave ka bërë që vendet të miratojnë masa të jashtëzakonshme për të garantuar që qytetarët e tyre të vaksinohen më parë.