Kosovë: Cilat masa kufizuese hiqen nga nesër?

Keystone EPA/VALDRIN XHEMAJ

Ministria e Administrimit të Pushtetit Lokal ka njoftuar se të hënën do të hapen lokalet e gastronomisë dhe qendrat tregtare, ndërsa masat e tjera do të rishikohen.

Kjo është bërë e ditur pas takimit të ministrit të MAPL-së, Elbert Krasniqi, dhe atij të Shëndetësisë, Arben Vitia, me kryetarët e komunave dhe Asociacionin e Komunave të Kosovës.

Në njoftimin për medie të kësaj ministrie është bërë e ditur se pas 18 prillit do të merren masa të reja për të parandaluar përhapjen e COVID-19.

“Duhet ta kemi të qartë se situata në institucionet shëndetësore është mjaft alarmante, sepse këto institucione janë të stërngarkuara me pacientë të infektuar me COVID 19 dhe hapësira e këtyre institucioneve afër limiteve. Masat e ndërmarra përfundojnë më 18 prill 2021 dhe më 19 prill duhen masa të reja për parandalimin dhe luftimin e pandemisë COVID 19.

Është shumë e rëndësishme që sot të diskutojmë bashkërisht që masat që do të hyjnë në fuqi të koordinohen së bashku me nivelin lokal dhe propozimet e juaja si kryetarë dhe përfaqësues të komunave janë shumë të rëndësishme”, thuhet në njoftim, përcjell Albinfo.ch.