Rriten çmimet e reklamave, Apple dhe Facebook rrisin të ardhurat

Tim Bennett @timbennettcreative

Apple dhe Facebook “fluturojnë” në Wall Street, pas tremujorëve mbi pritshmëritë e analistëve, duke zhvendosur në plan të dytë tensionet mes Tim Cook dhe Mark Zuckerberg mbi privatësinë. Fitimi i kompanisë me seli në Cupertino është më shumë se dyfishuar në tre muajt e parë të vitit në 23.6 miliardë dollarë, kurse të ardhurat u rritën ndjeshëm në 89.6 miliardë dollar.

“Tremujori tregon se si produktet tona kanë ndihmuar konsumatorët në këtë moment të jetës së tyre, por edhe optimizmi mbi faktin që ditë më të mira na presin përpara” – thotë Tim Cook, CEO i Apple, transmeton Ansa.

Facebook e mbylli tremujorin e parë me të ardhura në rritje me 48% në 26.1 miliardë dollarë, nga 23.1 miliardë që vinte bast tregu. Fitimi neto u rrit me 94% në 9.4 miliardë dollarë, nga 6.8 miliardë që ishin pritshmëritë. Rritja e të ardhurave – shpjegon David Wehner, chief financial officer, lidhet me rritjen e çmimeve të reklamave prej 30%, në atë që konsiderohet si shenjë e kërkesës së lartë.

Raportet tremujore fshehin, të paktën për një çast, tensionet midis Cook dhe Zuckerberg mbi azhurnimin më të fundit të sistemit operativ iOS. Përplasja ndodhi në distancë mbi App Tracking Transparency, ose transparenca në gjurmimin nga aplikacionet, që kërkon pëlqimin e përdoruesit për të ndjekur të dhëna në aplikacione ose në faqet e palëve të treta për qëllime reklamimi. Një funksion që Zuckerberg nuk e hodhi poshtë dhe nxori në pah dy qasjet e ndryshme të privatësisë së dy gjigantëve.