Maqedoni: Mbi 17 mijë persona kanë mbetur pa punë për shkak të pandemisë

Kreu i Agjencisë së Punësimit thotë se më shumë se 2,500 qytetarë kanë aplikuar për masën e vetëpunësimit

17,000 qytetarë kanë mbetur pa punë për shkak të pandemisë.

Ata mund të përfshihen në planin operativ të punësimit, por ai nuk ofron mundësi për të gjithë për të gjetur punë me ndihmën e shtetit.

Rreth 10,000 qytetarë do të mbulohen nga plani qeveritar i punësimit, ndërsa përparësi do të kenë ata që kanë humbur punën për shkak të krizës. Sot, Agjencia e Punësimit rishpalli vendet e lira të punës, të cilat do të zgjasin tre ditë, deri të premten, ndërsa ata që kanë aplikuar më parë nuk duhet të aplikojnë, transmeton Alsat, përcjell Albinfo.ch.

“Qytetarëve dhe punëdhënësve u japim edhe një shans tjetër shtesë për të aplikuar për programin e vetëpunësimit, masën e subvencionimit të pagës, masën e praktikës, masën e trajnimit në punë për një punëdhënës të njohur dhe programin e punëve publike”, deklaroi Jagoda Shahpaska.

Kreu i Agjencisë së Punësimit thotë se më shumë se 2,500 qytetarë kanë aplikuar për masën e vetëpunësimit. Për këtë masë mund të aplikohet deri të premten, presin më shumë kandidatë, ndërsa ndihmë do të marrin vetëm 1,762 persona.

Korniza financiare është aq sa është tani. Por, nëse në koordinim me përfaqësuesit e Qeverisë dhe përfaqësuesit e Ministrisë së Punës dhe Politikës Sociale, nëse jepet mundësia me ribalancin e ardhshëm të buxhetit që kjo shumë të jetë më e lartë në mënyrë që të mbulojë sa më shumë njerëz”- pohoi Abdush Demiri, Drejtor i APRM-së, përcjell tutje Albinfo.ch.

Disa nga aplikuesit do të marrin grante për vetëpunësim, disa do të punësohen drejtpërdrejt dhe të tjerët do të duhet të rikualifikohen për një punë të re. Drejtori i Agjencisë, Demiri, premton se kandidatët e përzgjedhur së shpejti do të nënshkruajnë kontrata pune.

 

---