Kosova
Kosovare Krasniqi në filmin “Në kërkim të Venerës”, aktorja më e mirë në Valencia
Ky çmim është vazhdimësi e sukseseve të qindpërqindta nga festivalet ku u nominua për çmime
Kosovare Krasniqi ka rrëmbyer çmimin e “Aktores më të mirë” në edicionin e 36-të të Festivalit prestigjioz të Filmit në Valencia për rolin e saj në filmin “Në kërkim të Venerës”.
Ky çmim është vazhdimësi e sukseseve të qindpërqindta nga festivalet ku u nominua për çmime. Fillimisht filmi debutoi me Çmimin special të jurisë për arritje të jashtëzakonshme artistike në Festivalin Ndërkombëtar të Filmit në Rotterdam në fillim të vitit. Më pas u nderua me dy çmime në Festivalin Ndërkombëtar të Hong-Kongut, për “Regjinë më të mirë” e për “Aktoren më të mirë”.
Vetë aktorja ka thënë se çmimin nuk e ka pritur fare.
“Prej ditës kur edhe u bë premiera e filmit, kam qenë gjatë tërë kohës nën ethe e me shumë emocione, por që një sukses të tillë nuk e mendoja fare. Isha në vendin e punës kur e kuptova lajmin dhe ishte një super lajm për mua. Një vlerësim i tillë nga festivali, më rrëqethi e më lumturoi shumë. Po ndihem me fat dhe e nderuar për këtë vlerësim e për secilin vlerësim që i është bërë filmit deri më tash, në rrugëtimin e tij i cili sapo ka filluar”, është shprehur ajo për Kohën, transmeton Albinfo.ch.
Për sukseset e pandalshme, producenti i filmit, Besnik Krapi, ka uruar gjithë ekipin.
“Kush tha që s’na njeh Spanja?! ‘Moon of Valencia’ shkon për Kosovare Krasniqi – Aktorja më e mirë – në rol kryesor!”, ka shkruar ai duke shtuar se “deri tash, në çdo festival kemi marrë nga një çmim.”
Filmi, me regji të Norika Sefës, që zhvillohet në një fshat kodrinor të Kosovës, ndjek ngjarjen e një adoleshenteje fjalëpakë që quhet Venera (një talente e re, Kosovare Krasniqi), e cila jeton në një shtëpi të vogël me prindërit e saj, dy vëllezërit me të rinj dhe me gjyshen e saj. Jashtë ka shumë pak për të parë dhe shijuar, dhe shumica e lëvizjeve të saj përcillen nga vëllezërit e saj, nipërit ose fqinjët që e ruajnë atë dhe “reputacionin e mirë” të familjes. Por Venera ëndërron për një të ardhme më ndryshe – dhe shpirti i saj gjallërohet kur ajo bëhet shoqe me rebelen Dorina (që luhet nga Rozafa Çelaj). Me lezet dhe ndjeshmëri, Sefa eksploron në thellësi zhvillimin seksual dhe mental të Venerës, pa hezituar të portretizojë ngacmimet e zakonshme që asaj i bëhen nga moshatarët dhe prindërit.
“Në kërkim të Venerës” është bashkëprodhim në mes të Kosovës dhe Maqedonisë së Veriut, i prodhuar nga “Circle Production” me bashkëproducentë Igor Popovskin dhe Gazmend Nelën. Filmi, gjithashtu, është mbështetur edhe nga Komuna e Prishtinës dhe nga ajo e Kaçanikut. Për këtë projekt Qendra Kinematografike e Kosovës ka ndarë 200 mijë euro.
Në film përveç Kosovare Krasniqit luajnë edhe Rozafa Çelaj, Erjona Kakeli, Basri Lushtaku, Bleon Makolli, Fatushe Nushi, Ajan Zharku, Ermal Bilalli, Tristan Halilaj, Shend Miftari, Anisa Ismajli, Sheqerie Buqaj e të tjerë.
E-Diaspora
-
Arnold “The Cobra” Gjergjaj triumfon në luftën e fundit Gjatë së shtunës Arnold “The Cobra” Gjergjaj triumfoi kundër Dennis Lewandowski. Kjo ndeshje e madhe u...
-
Nju-Jork: Baleti Kombëtar i Kosovës me dy shfaqje
-
Belgjikë: Kori “Siparantum” do të dhuroj paraqitje dinjitoze
-
Çikago: Pianistja Anila Aliu, me koncert recital
-
Sopranoja Elbenita Kajtazi ndan bursa vjetore për studentët shqiptarë të muzikës
Jeta në Zvicër
-
Zgjedhjet Evropiane 2024: Një e katërta e popullsisë zvicerane ka të drejtë vote Ka më shumë votues të BE-së që jetojnë në Zvicër sesa në disa shtete anëtare. Por...
-
Zvicër: 26-vjeçari vozit me 161 km/h në zonën e kufizimit 80 km/h
-
AAK – dega në Zvicër zgjedh strukturat drejtuese
-
Incidentet raciste në Zvicër – në rritje, veçanërisht në shkolla
-
Si mund të ndikojnë tek ju dy referendumet vendimtare të sigurimeve shëndetësore në Zvicër?