Ku do të gjykohet shoferi që shkaktoi aksidentin tragjik në Kroaci?

Shoferi i autobusit do të gjykohet në Kroaci nga gjykata kroate, sipas legjislacionit që ka në fuqi ky shtet

“Ngjarja ka ndodhur në territorin e Kroacisë, prandaj vetëm organet kompetente kroate kanë të drejtë hetimin e rastit”, thonë përfaqësues të Departamentit për Bashkëpunim Ndërkombëtar nga Ministria e Drejtësisë në Kosovë, për Albanian Post, për rastin e shoferit të autobusit nga kompania “Deva Tours”, ndaj të cilit këtë të martë u caktua masa e sigurisë, paraburgim për një muaj.

Kjo, pas aksidentit të shkaktuar para dy ditësh, ku humbën jetën 10 persona dhe 40 të tjerë u lënduan.

“Arsyet janë të qarta, Kosova nuk ka juridiksion në atë se çka ka ndodhur në territorin e Kroacisë”, thonë nga ministria.

Gjithashtu, bëhet e ditur se “nuk mund të kërkojnë ekstradimin e tij, pasi që shoferi në këtë rast nuk është shpallur ‘person në kërkim’ nga organet tona gjyqësore për qëllim të zhvillimit të procedurës penale ose për ekzekutimin e dënimit”.

Shoferi i kompanisë “Deva Tours” mund të kthehet në Kosovë vetëm pas vendimit përfundimtar të Gjykatës e cila do të merret me rastin e tij.

“Nëse shpallet fajtor, atëherë mund të paraqitet kërkesa për t’u transferuar në Kosovë që të vuajë dënimin”, thuhet më tej në përgjigjet e Ministrisë së Drejtësisë, përcjell Albinfo.ch.

“Sa i përket rastit në fjalë, Ministria e Drejtësisë e Republikës së Kosovës nëse pranon ndonjë letërporosi nga autoritetet kroate, e njëjta do të procedohet sa më shpejt që është e mundur dhe sipas procedurave të theksuara në Marrëveshjen Dypalëshe në fuqi, për Ndihmë të Ndërsjellë Juridike në çështje penale”.

Gjithashtu, në këtë shkresë elektronike nga MD thuhet se “personi i dyshuar është shtetas kosovar dhe sikur të ishte në kërkim nga organet tona gjyqësore, marrëveshja nuk do të ishte pengesë për ekstradimin e tij”.

Shoferit të autobusit që dyshohet se e shkaktoi aksidentin në Slavonski Brod të Kroacisë i është caktuar masa e paraburgimit prej një muaji.

“Paraburgimi u urdhërua për shkak të rrezikut që ai të arratiset, ai është një shtetas i Republikës së Kosovës, Kroacia ka disa marrëveshje me Kosovën, por nuk ka asnjë marrëveshje për ekstradimin e shtetasve të saj kundër të cilëve janë procedurat penale duke u kryer”.

“Avokati i shtetit njoftoi se ai do të propozonte marrjen në pyetje të disa dëshmitarëve që ishin në autobus, kështu që një seancë tjetër do të mbahet sot“, u tha gazetarëve gjyqtari hetues Mile Soldo, raportn Index.hr.

Kujtojmë se shoferi 52-vjeçar i autobusit me targa të Kosovës gjatë aksidentit të së dielës ku vdiqën 10 pasagjerë u mbrojt në heshtje gjatë marrjes në pyetje në Zyrën e Prokurorit të Shtetit të Qarkut në Slavonski Brod.

 

---