Kosovë: Përkeqësohet situata, klinika infektive nuk ka më shtretër të lirë

Rritja e rasteve me Covid-19 në Kosovë, po ndikon edhe në mbingarkesën e spitaleve.

Në Klinikën Infektive në Prishtinë, më 19 gusht, nuk ka pasur asnjë shtrat të lirë, transmeton Albinfo.ch.

Infektologu Izet Sadiku, ka bërë të ditur për Radion Evropa e Lirë, se nga 110 pacientë të cilët po trajtohen në Klinikën Infektive, rreth 90 për qind e tyre janë me oksigjeno-terapi dhe shumica janë të pavaksinuar.

“Edhe pse është një kohë e shkurtër që ka filluar kjo vala e fundit, por përshtypjet tona janë që për këtë kohë të shkurtër, format klinike janë më të rënda sesa që kanë qenë në faza tjera. Prandaj për këtë po ju bëjmë apel njerëzve t’i respektojnë masat, të mbajnë distancë, të mos grumbullohen pa nevojë. Dhe njëkohësit të iu krijohen mundësitë që të vaksinohen sa më shumë për arsye se vaksina është mjeti kryesor për parandalimin e sëmundjes”, tha Sadiku.

Për shkak të përkeqësimit të situatës, nga nesër në Kosovë hyjnë në fuqi masa te reja kufizuese.

---