Mergim Berisha, hyn në lojë, godet nga gjuajtja e lirë dhe shënon

Gol mahnitës i Berishës pas vetëm 25 sekondave që hyri në lojë

Që nga fillimi i sezonit të ri, Mergim Berisha nuk u aktivizua në lojë. Fillimisht për shkak të një transferimi të mundshëm në Bundesligën gjermane, e më pas kishte një lëndim që zgjati për disa javë. Në ndeshjen e fundjavës ndaj Austria Klagenfurt, futbollisti i Red Bull Salzburg futet në lojë në minutën e 70. Pas vetëm 25 sekondave, me prekjen parë të topit, nga një gjuajtje e lirë, Berisha arrin të tundë rrjetën e kundërshtarit.

“Zgjati paksa shumë kohë. Tani jam i lumtur që jam përsëri këtu,” tha sulmuesi për sna.at, i cili nuk donte të komentonte thashethemet për transferimin e tij në një klub tjetër. “Unë jam thjesht i lumtur që jam kthyer në fushë,” tha Berisha kur u pyet nëse ai patjetër do të qëndrojë në Salzburg, përcjell albinfo.at.

Në fitoren 3-1 në shtëpi të RB Salzburgut kundër Austrisë Klagenfurtr, 22-herë golashënuesi i sezonit 2020/21 festoi një rikthim mahnitës.

Në anën tjetër lojë të bukur ka treguar edhe mesfushori shqiptar Vesel Demaku i cili u aktivizua për 90 minuta në ndeshjen që skuadra e tij, Austria Vienna e luajti kundër skuadrës së Sturm Graz, në barazimin 2:2.

Demaku ishte i palodhshëm në repartin e mesfushës dhe është vlerësuar lartë nga mediet austriake.

---