Shqipëria, e gatshme të dërgojë 5 mijë shoferë ‘pa pagesë’ në Britani

Ambasadori i Shqipërisë në Mbretërinë e Bashkuar (MB), Qirjako Qirko, ka deklaruar për të përditshmen “The Guardian” se nëse qeveria britanike do të ketë nevojë, Shqipëria ka gati 5 mijë shoferë.

Kjo deklaratë e ambasadorit ka ardhur në vazhdën e ndihmës për të trajtuar krizën e karburantit që ka kapur Britaninë.

“Nëse qeveria juaj do të donte, ne mund të ofrojmë shoferë të mirë, të besueshëm, ndoshta 5 mijë menjëherë”, tha Qirko për “The Guardian”.

Por Qirko theksoi se “këta shqiptarë janë gati të punojnë që qeveria britanike të kapërcejë problemin pa pagesë”.

Ambasadori shtoi se shumë prej 150 mijë shqiptarëve që jetojnë në MB do të punonin nga mirënjohja për mikpritësit e tyre britanikë.

“Shqiptarët në Mbretërinë e Bashkuar do të punonin falas për këtë vend për shkak të asaj që MB-ja ka bërë për ta… Ne i jemi mirënjohës përgjithmonë qeverisë dhe ushtrisë së këtij vendi, për atë që bënë për vëllezërit tanë në Kosovë”, ravijëzoi Qirko.

“The Guardian” shkruan në artikullin e saj se meqenëse një numër i konsiderueshëm besohet të jetë i padokumentuar, është e pamundur të dihet se sa janë shoferët e kualifikuar të kamionëve.

Qirko, ndërkaq, u bëri thirrje britanikëve që t’i shikojnë shqiptarët si një pasuri dhe jo si një problem.

Për ambasadorin shqiptar, ata shpesh portretizohen si anëtarë bandash, shpërndarësish droge dhe trafikantë njerëzish, përfshirë nga organet qeveritare si Agjencia Kombëtare e Krimit.