Në Zvicër do të mbahet referendum për kontrollin e qirave

(KEYSTONE/Martial Trezzini)

Shoqata Zvicerane e Qiramarrësve ka mbledhur mbi 140 mijë nënshkrime, duke siguruar mbajtjen e një referendumi kombëtar për ndryshimin e sistemit të kontrollit të qirave në vend.

Nisma synon që qiratë të monitorohen automatikisht dhe të ulen kur konsiderohen të tepruara, pa qenë nevoja që qiramarrësit të nisin vetë procedura ligjore kundër pronarëve ose kompanive të menaxhimit të banesave.

Sipas organizatorëve, sistemi aktual ua lë barrën qiramarrësve të sfidojnë rritjet e padrejta të qirasë, ndërsa shumë prej tyre hezitojnë ta bëjnë këtë nga frika se mund të humbin banesën e tyre, transmeton albinfo.ch.

Shoqata argumenton se kontrolli automatik do të ofronte mbrojtje më të madhe për qiramarrësit dhe do të ndihmonte në frenimin e abuzimeve në tregun e banesave, veçanërisht në qytetet ku çmimet e qirave janë rritur ndjeshëm vitet e fundit.

Data e referendumit ende nuk është caktuar, por iniciativa do t’u japë qytetarëve zviceranë mundësinë të vendosin nëse vendi duhet të forcojë mekanizmat e kontrollit të qirave dhe mbrojtjen e qiramarrësve.