Zvicër: Vaksinimi i tretë mund të fillojë në fund të tetorit

Miratimi është i mundur të fillojë deri në fund të tetorit nëse kompanitë bashkëpunojnë, ka thënë Claus Bolte nga Swissmedic

Shumë njerëz në Zvicër po presin me padurim vaksinimin e tretë. Siç është raportuar tashmë, kanë filluar të shtohen rastet e vdekjes së të moshuarve që kanë marrë dy dozat e para të vaksinës.

Vaksinën përforcuese dhe efektin e saj tashmë e kanë provuar vendet si  Izraeli, SHBA, Austria etj., shkruan srf.ch.

Por, në Zvicër po mbretëron një mungesë gatishmërie për ta bërë këtë. Deri më tani, Instituti zviceran i produkteve terapeutike Swissmedic nuk ka pranuar të caktonte një datë të miratimit të vasinës përforcuese.

Ndërkaq Claus Bolte, Shef i Autorizimit në Swissmedic, është bërë për herë të parë sot më specifik lidhur me terminin në fjalë, transmeton albinfo.ch.

Ai, në magazinën e lajmeve të televizionit SRF, “10vor10” ka thënë: “Po flas për disa javë, ndoshta dy ose tri. Kjo tani në thelb varet nga kompanitë dhe kur ato do t’u përgjigjen pyetjeve tona në mënyrë të tillë që ne gjithashtu të mund të japim miratimin”.

Miratimi është i mundur të fillojë deri në fund të tetorit nëse kompanitë bashkëpunojnë, ka thënë Bolte. Atëherë asgjë nuk do ta pengojë më vaksinimin përforcues në Zvicër.

---