Austri: Mbi 4.5 milionë banorë kanë marrë dozën e tretë të vaksinës

Deri më tash në Austri me dozën e parë janë vaksinuar 75.8 për qind, me dozën e dytë 72,2 për qind, ndërsa me dozën e tretë 51 për qind, apo mbi 4,5 milion persona

Që nga hyrja në fuqi e vaksinimit të detyrueshëm në Austri, dhe e kërkesës për marrjen e vaksinës përforcuese pas skadimit të afatit të certifikatës, ka filluar një fluks dukshëm më i madh i qytetarëve për të marrë vaksinën. Radhët e personave nëpër qendra të vaksinimit janë të gjata. Në njërën nga qendrat e vaksinimit në Vjenë “Austria Center Vienna” duhet të pritej mbi 2 orë për të marrë vaksinën. Kjo mund të shihet edhe nga fotoja e realizuar nga albinfo.at.

Sipas një raporti të publikuar nga heute.at, deri më tash në Austri me dozën e parë janë vaksinuar 75.8 për qind, me dozën e dytë 72,2 për qind, ndërsa me dozën e tretë 51 për qind, apo mbi 4,5 milionë persona.

Megjithatë, Austria ka filluar të mendojë edhe për dhënien e dozës së katërt të vaksinës. Ekspertët e Koordinimit Kombëtar të Krizave (GECKO) kanë diskutuar se pas sa kohe qytetarët duhet të marrin dozën e katërt nëse është e nevojshme.

“Nëse variantet e ngjashme me ato aktuale mbeten dominuese, atëherë sigurisht që ka kuptim të merret në konsideratë doza e katërt, e cila mendohet të fillojë nga vjeshta për këdo që vaksinimi i tretë është më shumë se gjashtë deri në nëntë muaj më parë, thonë ekspertët.

Të dielën në Austri u raportuan 29,324 raste të reja. Siç shpjegoi shefja e GECKO-s, Katharina Reich, numri i infeksioneve të reja këtë javë ka rënë dukshëm. Megjithatë, mund të supozohet se infeksionet do të mbeten në nivele të larta. “Situata është ende e paqëndrueshme”, ka shtuar ekspertja.

Në raport thuhet se nëse del ndonjë variant krejtësisht i ri, shumë gjëra do të hapën sërish, mirëpo mendohet se mbrojtja më e mirë është përmes vaksinimit.

---