BE do të ngrijë pasuritë e Putinit dhe Lavrovit

Për një veprim të tillë, vendet e BE-së janë marrë vesh në kuadrin e zbatimit të vendimeve të samitit special të BE-së të enjten në mbrëmje

Sipas informacioneve nga një zyrtar i paidentifikuar i BE-së, vendet e BE-së kanë rënë dakord të ngrijnë asetet e presidentit rus, Vladimir Putin dhe ministrit të Jashtëm, Sergej Lavrov.

Për këtë veprim janë marrë vesh në kuadrin e zbatimit të vendimeve të samitit special të BE-së të enjten në mbrëmje, transmeton albinfo.ch.

Një zyrtar i BE-së ka thënë gjithashtu për agjencinë e lajmeve Reuters të premten se janë duke u punuar elemente të tjera të raundit të tretë të sanksioneve kundër Rusisë për pushtimin e Ukrainës.

“Ne po veprojmë sa më shpejt që të mundemi”, është shprehur zyrtari në fjalë, përcjell albinfo.ch. BE-ja mund të shënjestrojë gjithashtu edhe “shumë oligarkë të tjerë”.

Pak më parë, presidenti ukrainas, Volodymyr Zelenskiy, ishte ankuar për reagimin joadekuat, gjegjësisht, të dobët, të Evropës ndaj sulmeve ruse në Ukrainë.

---