Kosovari arrestohet duke hyrë në Gjermani, 17 vjet pas vuajtjes së gjysmës së dënimit

Kur policia Federale ia vuri në dukje këtë fakt në momentin e hyrjes në Gjermani, ai u shpreh i befasuar sepse avokati i tij i kishte thënë se ndalimi i hyrjes ishte hequr

Një 52-vjeçar, shtteas i Kosovës, është arrestuar nga Policia Federale kur ishte duke hyrë në aeroportin e Shtutgartit, transmeton albinmfo.ch. Arrestimi është bërë për shkak se ndaj tij kishte një urdhër arresti prej 17-vitesh.

Ai, në vitin 2000 ishte dënuar me njëmbëdhjetë vjet burg për vrasje nga pakujdesia, ka sqaruar të premten një zëdhënëse e Policisë Federale.

Në gjysmën e mbajtjes së burgut, pra, në vitin 2005, kosovari, atëbotë 35-vjeçar qe deportuar në vendin e tij, shkruan DPA.de.

Me atë rast ishte rënë dakord që, në rast të rihyrjes në Gjermani, duhej të vazhdohej mbajtja e pjesës së mbetur të burgut.

Kur policia Federale ia vuri në dukje këtë fakt në momentin e hyrjes në Gjermani, ai u shpreh i befasuar sepse avokati i tij i kishte thënë se ndalimi i hyrjes ishte hequr, përcjell albinfo.ch. Sipas Policisë Federale, kështu është sa i përket ligjit të imigracionit. Por urdhrat e arrestit të shqiptuara nga organet e rendit vazhdojnë të jenë të vlefshëm.

Pas konsultimit me prokurorinë publike të Heilbronn-it, është ekzekutuar urdhri i arrestit, gjegjësisht kosovari u dërgua në një institucion korrektues.

---