Kantonet zvicerane po përgatiten për fluksin e refugjatëve

Zyrtarët në Zvicër preferojnë t'i vendosin të ardhurit nga Ukraina në apartamente dhe jo në objekte të mbrojtjes civile.

Kantonet dhe komunat në të gjithë Zvicrën po kërkojnë mundësi të mundshme akomodimi për refugjatët ukrainas – veçanërisht për gratë dhe fëmijët, pasi burrat në moshë ushtarake nuk lejohen të largohen nga Ukraina, transmeton albinfo.ch.

Autoritetet kantonale thanë se planifikimi është bërë më i vështirë sepse është e paqartë nëse refugjatët do të vijnë në Zvicër në faza ose të gjithë menjëherë brenda një periudhe të shkurtër kohore.

Për shkak se priten shumë fëmijë të vegjel dhe nëna, zyrtarët preferojnë t’i vendosin të ardhurit në apartamente dhe jo në objekte të mbrojtjes civile.

“Kjo është për të siguruar që këta njerëz të kenë mundësi të mira akomodimi në komunitete”, tha drejtori i shërbimeve sociale të Cyrihut, Raphael Golta. /Albinfo.ch

---