Ambasada e Zvicrës, në mbështetje të grave kosovare me aftësi të kufizuara

Në mbështetje të grave me aftësi të kufizuara të cilat ende janë shumë shpesh subjekt i diskriminimit të dyfishtë.

Për të festuar Ditën Ndërkombëtare të Gruas, Ambasada e Zvicrës iu bashkua mbledhjes paqësore të organizuar nga OJQ – You Can Do, në mbështetje të grave me aftësi të kufizuara, të cilat ende janë shumë shpesh subjekt i diskriminimit të dyfishtë, transmeton albinfo.ch.

Meqë Qeveria e Kosovës e ka etiketuar vitin 2022 si “Viti i personave me aftësi të kufizuara”, mezi presim të shohim progres nga institucionet përgjegjëse drejt themelimit të një shoqërie me diversitet dhe gjithëpërfshirje me mundësi për të gjithë, duke marrë përfitime dhe shërbime për personat me aftësi të kufizuara.

Vlen të theksohet se shteti i Zvicrës ka ndihmuar gratë kosovare në përgjithësi.

«Ne po e mbështesim trajnimin e 700 grave në sektorin e ëmbëlsirave dhe bukës, në mënyrë që ato të mund të hapin ose të zgjerojnë një biznes. Gratë po mbështeten edhe në sektorin bujqësor, siç është prodhimi i bimëve shëruese dhe aromatike. Si rezultat i mbështetjes zvicerane 1,436 gra kanë gjetur një punë të re në katër vjetët e fundit. Për t’i luftuar paragjykimet dhe stereotipat mbizotërues në shoqëri, Zvicra ka zhvilluar edhe një fushatë vetëdijësuese për ta promovuar arsimimin e vajzave», është shprehur ambasadori i Zvicrës, Thomas Kolly, për albinfo.ch.

---