Gjermania po debaton për heqjen e detyrimit të izolimit

Ministri i shëndetësisë: Karl Lauterbach: “Njerëzit e infektuar duhet të qëndrojnë në shtëpi. Përndryshe, edhe vetë vendi i punës do të bëhet një rrezik sigurie”

Kërkesa e kreut të mjekëve të sigurimeve shëndetësore, Andreas Gassen, për heqjen e të gjitha detyrimeve të izolimit dhe karantinës në kulm të valës së verës së Koronës, ka hasur në kundërshtime, shkruan srf.ch.

“Njerëzit e infektuar duhet të qëndrojnë në shtëpi. Përndryshe, jo vetëm që do të rritet edhe më shumë numri i rasteve, por edhe vetë vendi i punës do të bëhet një rrezik sigurie”, ka shkruar Ministri Federal i Shëndetësisë Karl Lauterbach (SPD) në Twitter të shtunën.

Ministri i Shëndetësisë i Bavarisë Klaus Holetschek (CSU) ka thënë gjithashtu se propozimi ishte i parakohshëm. Por të tjerët kanë rënë dakord me Gassen-in, të paktën në vlerësimin e tij për situatën aktuale të koronës.

Incidenca e fundit shtatë-ditore ishte mbi 700 – por për disa kohë ekspertët kanë supozuar se rastet aktuale janë nën raportuar ndjeshëm, transmeton albinfo.ch. Numri absolut i pacientëve në repartet e terapisë intensive aktualisht është dy herë më i lartë se në të njëjtën kohë të vitit të kaluar.

---