Von der Leyen: Britania e Madhe të vazhdojë të respektojë marrëveshjen e Brexit

Presidentja e Komisionit Evropian, Ursula von der Leyen, shprehu sot pritshmërinë që Britania e Madhe të respektojë të gjitha aspektet e marrëveshjes së Brexit gjatë mandatit të kryeministres Liz Truss.

“Së bashku ne përballemi me sfida të shumta, nga ndryshimet klimatike deri te pushtimi i Ukrainës nga Rusia. Unë pres një bashkëpunim konstruktiv, me respekt të plotë për marrëveshjet tona”, tha Von der Leyen në një postim në Twitter.

Sot, Truss mundi ish-ministrin e Financave, Rishi Sunak, në një votim brenda partisë në garën për presidencën e Partisë Konservatore në pushtet.

Ajo do të bëhet kryeministre kur Mbretëresha Elizabeth II ta ftojë të formojë një qeveri të re nesër në një pritje në Kalanë Balmoral në Skoci.