Sommaruga bën pauzë nga puna pasi bashkëshorti i saj është shtruar në spital

Simonetta Sommaruga dhe shkrimtari nga Berna, Lukas Hartmann, janë të martuar që nga viti 1996

Këshilltarja Federale Simonetta Sommaruga do të mungojë përkohësisht nga puna, transmeton albinfo.ch. Kështu ka bërë të ditur të hënën Departamenti i saj për Mjedis, Transport, Energji dhe Lidhje (UVEK).

Shkak për mungesën është bërë gjendja shëndetësore e bashkëshortit të saj, i cili është në spital.

Sommaruga, Këshilltare Federale (ministre) që nga viti 2010 dhe Presidente Federale në vitin 2015 dhe 2020, është e martuar me shkrimtarin e njohur zviceran, Lukas Hartmann.

Lukas Hartmann është “në duar të sigurta”, thuhet në njoftimin, i cili është i disponueshëm edhe për CH Media. “Përveç kësaj, ne kërkojmë që të respektohet privatësia e këshilltares federale dhe bashkëshortit të saj”, thuhet në njoftim.

62-vjeçarja Simonetta Sommaruga dhe shkrimtari nga Berna, Lukas Hartmann, janë të martuar që nga viti 1996. Ata fillimisht jetuan në periferinë e Bernës, në Köniz; tani prej disa vitesh, jetojnë në qytetin e Bernës.

Lukas Hartmann është pseudonim: emri i vërtetë i bashkëshortit 78-vjeçar të këshilltares federale është Hans-Rudolf Lehmann.

 

---