Edhe një klasë e re shqipe në Bex, të Kantonit Waadt

Përpjekjet në shërbim të fëmijëve të mërgimtarëve shqiptarë, të cilët punojnë dhe veprojnë në Zvicër, kanë filluar t’i tejkalojnë edhe parashikimet tona. Nga java në javë, nga muaji në muaj kemi më tepër klasa dhe, natyrisht më tepër nxënës, të cilët regjistrohen në pikat shkollore në të cilat zhvillohet mësimi në gjuhën amtare, përcjell albinfo.ch.

Fakt është se aty ku bëhen bashkë prindër dhe mësues nuk mungojnë sukseset në shërbim të shkollës shqipe. Kështu, edhe javën e kaluar u hap shkolla e radhës, e cila iu bashkëngjitet dhjetëra e dhjetëra shkollave të hapura deri më tani, duke përfshirë qindra fëmijë në bankat shkollore për të mësuar gjuhën shqipe. E gjithë kjo po ndodh në prag të festave të nëntorit: 114 vjetorit të Kongresit të Alfabetit, 110 vjetorit të  shpalljes së Pavarësisë së Shqipërisë si dhe 50 vjetorit të Kongresit të drejtshkrimit. Dhe, natyrshëm nëntori është muaji që motivon dhe obligon shqiptarët të punojnë e të veprojnë edhe më tepër në shërbim të ruajtjes së gjuhës dhe kulturës kombëtare. Në këtë rrugëtim edhe mësuesit dhe prindërit e shkollave shqipe në Zvicër të përkushtuar rreth rolit të tyre në hapjen e pikave të reja shkollore dëshmojnë gjithnjë e më tepër se “aty ku punohet, edhe sukseset nuk mungojnë”. Në këtë pikë shkollore punon mësuesja Rahime Latifi dhe mësimi zhvillohet çdo të shtunë, nga ora 10:00-12:00.

“Shkolla shqipe” në Zvicër falënderon prindërit shqiptarë për përkrahjen e vazhdueshme në realizimin e detyrave të përbashkëta kombëtare, me qëllim që të hapim sa më shumë pika shkollore dhe që fëmijët shqiptarë ta kenë sa më afër pikën shkollore për ta mësuar gjuhën amtare.

Tani çdo javë do të zhvillohet mësimi i gjuhes shqipe për fëmijët shqiptarë në Bex, ku përfshin rrethet Le Glarey, Cotterd, Le Bévieux, Le Châtel, Chiètres, La Forêt, Le Chêne, Les Dévens dhe Fenalet.  Rreth 6600 njerëz jetojnë në Bex dhe rrethet e tij, shumë prej tyre janë edhe shqiptarë.  /Albinfo.ch