2023-a, e pasigurt për eksportet gjermane

Mësohet se eksportet gjermane ka të ngjarë të ulen me dy për qind në vitin 2023 për shkak të ngadalësimit të ekonomisë globale, ka vlerësuar Dhoma Gjermane e Tregtisë dhe Industrisë (DIHK), përcjell albinfo.ch.

Kjo do të thotë se të ardhurat e eksportuesve gjermanë do të uleshin me 70 miliardë euro.

“Eksportet kanë filluar tashmë të ulen,” tha kreu i dhomës Volker Treier.

Një sondazh i DIHK-së tregoi se 47 për qind e gjithsej 3100 kompanive gjermane aktive jashtë vendit presin një ngadalësim të aktiviteteve ekonomike në tregjet e tyre të eksportit.

Një përqindje më e lartë e “pesimistëve”, deri në 67 për qind, u regjistrua vetëm në pranverën e vitit 2020, në fillim të pandemisë Covid-19.

“Ekonomia botërore është në prag të një dimri të akullt dhe arsyet kryesore janë pasojat ekonomike të luftës ruse kundër Ukrainës dhe politika kineze e tolerancës zero ndaj Covid-it”, është përfundimi i hulumtimit.

Në vitin 2023, DIHK pret në rastin më të mirë një rritje prej 2.5 për qind të ekonomisë botërore, afërsisht në përputhje me parashikimet e Fondit Monetar Ndërkombëtar (FMN).

Megjithatë, duket se eksportuesit janë më të sigurt për të ardhmen sesa kompanitë e fokusuara në tregun vendas. Kështu, pothuajse 40 për qind e të anketuarve presin biznes më të mirë jashtë vendit në vitin e ardhshëm, dhe 42 për qind nuk shohin ndonjë ndryshim në biznesin aktual, tregoi sondazhi.

Për krahasim, në grupin e kompanive që operojnë në tregun gjerman, vetëm tetë për qind e tyre presin një përmirësim në vitin 2023 dhe 52 për qind e tyre mendojnë se do të jetë edhe më keq, sipas një sondazhi të veçantë të DIHK.