NATO mobilizohet për të vrojtuar Rusinë

NATO ka dërguar disa avionë në Rumani për të rritur më shumë sigurinë në pjesën lindore të aleancës si dhe për të monitoruar aktivitetin ushtarak të Rusisë.

Avionët gjermanë AWACS kanë mbërritur këtë të martë në bazën e Otopenit në Bukuresht dhe do të qëndrojnë aty për disa javë.

“Shumë shpejt do të ndërmarrim një mision në Bukuresh. Ky është një kontribut i rëndësishëm i NATO-s për të rritur sigurinë në vendet e aleancës”, u shpreh drejtuesi i misionit, Stefan W. Neumann.

Ndërkohë që ambasadori gjerman në Rumani, Peer Gebauer, shprehu edhe një herë angazhimin e Gjermanisë për të qëndruar përkrah aleatëve si Rumania në këto kohë sfiduese për Europën, për shkak të luftës në Ukrainë, transmeton cnn, përcjell albinfo.ch.

Aleanca e Atlantikut Verior prej muajsh tashmë ka rritur prezencën e saj në lindje të Europës dhe Baltik, duke dërguar avionë ushtarakë, monitorues dhe tanke.