Mungesa e borës, paralajmërohen thatësira ekstreme

Frika nga thatësira po rritet në Evropë, pasi matjet e borës nëpër Alpe tregojnë vetëm një pjesë të akumulimit normal në këtë periudhë të vitit dhe reshjet në vende, si Italia dhe Franca, kanë qenë gjithashtu shumë të ulëta këtë muaj.

”Në Francë, Zvicër, Itali dhe pjesë të Austrisë ka dukshëm më pak borë se mesatarja”, theksoi meteorologu Klaus Haslinger i GeoSphere Austria, shërbimi shtetëror i motit, transmeton dpa, përcjell albinfo.ch.

Në Itali organizata jofitimprurëse mjedisore Legambiente paralajmëron se muajt e fundit në Alpet italiane ka rënë 53% më pak borë sesa mesatarja afatgjatë.

Problemi nuk është vetëm mungesa e borës, por edhe mungesa e shiut.

Në pellgun e lumit Po, i cili gjarpëron në veri të Italisë, reshjet janë ulur 61% nga mesatarja historike, tregojnë të dhënat.

Në Francë, pas disa javësh pa reshje shiu, ka frikë nga një verë e dytë radhazi me thatësirë dhe kufizime të ujit.

”Por kjo nuk është hera e parë që kushte të tilla moti kanë shkaktuar vite me reshje jashtëzakonisht të ulëta”, vuri në dukje Haslinger.

Gjashtëdhjetë vjet më parë, pati një kohë të thatë që zgjati disa vjet për shkak të shpërndarjeve të caktuara të temperaturës në tokë dhe det.

Haslinger tha se ka prova se ngrohja globale po favorizon këto modele të temperaturës, duke i bërë kushtet e rregulluara më të zakonshme në vitet në vijim.

“Nëse moti i pranverës është i ngjashëm me 2022, thatësira do të bëhet shumë më e keqe”, paralajmëroi Josef Eitzinger, një meteorolog bujqësor në Universitetin e Burimeve Natyrore dhe Shkencave të Jetës në Vjenë.