Vdes futbollisti shqiptar në një aksident trafiku në Itali

Në një aksident tragjik në autostradën pranë Piaçencës në Itali ka mbetur i vdekur i riu shqiptar Detar Tali Muça, 26-vjeçar.

Mediat raportojnë se ai ishte i njohur në komunitetin e futbollit amator në këtë provincë në Itali. Vdekja e tij erdhi pasi makina me të cilën udhëtonte u përplas me një makinë të tonazhit të lartë.

Ai u transportua me urgjencë në spital në Parma, ku për fat të keq nuk ia doli të fitonte ndeshjen më të rëndësishme.

“Një lajm që na ka trishtuar shumë. Kemi mbetur pa fjalë të gjithë”, tha për mediat italiane drejtori sportiv i Sale, Alberto Del Konte.

Futbollisti shqiptar luante për këtë skuadër prej tre vjetësh, ndërsa më parë kishte luajtur edhe për Derthona, San Xhiuliano Nuovo, Garbanja apo Audaks Orione S. Bernardino.