Arsyet pse autoritetet zvicerane mund të refuzojnë rinovimin e lejes së punës

Heqja e lejes është ndoshta skenari më i keq për çdo shtetas të huaj. Megjithatë, ka disa situata që mund të rezultojnë në këtë masë drastike, disa të parandalueshme dhe të tjera jashtë kontrollit të personit, përcjellë albinfo.ch.

Arsyet kryesore janë:

Pushimi nga puna ose skadimi i kontratës

Kjo ka të bëjë veçanërisht me shtetasit e vendeve të treta, pasi ata punojnë në Zvicër në kushte më të rrepta se sa homologët e tyre të BE/EFTA, shkruan thelocal.ch.

Nëse lejet afatshkurtra L ose B janë të lidhura me një punë të caktuar, e cila përfundon brenda periudhës kohore të caktuar (zakonisht deri në një vit), atëherë leja e tyre skadon kur kontrata të përfundojë.

Duke qenë se shtetasit e vendeve të treta i nënshtrohen një sistemi kuotash, lejet e tyre të punës nuk rinovohen automatikisht.

Këtu qytetarët e vendeve të treta janë në disavantazh përballë homologëve të tyre evropianë, të cilët kanë një akses praktikisht të pakufizuar në lejet e punës zvicerane.

Por në rrethana të caktuara, edhe ata mund të shohin tërheqjen e lejeve të tyre.

Për shembull, leja juaj nuk do të zgjatet nëse ju harroni ta rinovoni atë, në mënyrë tipike, ju do të merrni një letër nga autoritetet lokale afërsisht gjashtë javë përpara afatit që ju kujton të rinovoni. Do të ketë gjithashtu një formular aplikimi që do t’ju duhet të plotësoni, shkruan thelocal.ch.

Ai duhet të dorëzohet në komunën e banimit jo më herët se tre muaj dhe jo më vonë se dy javë përpara datës së skadimit.

Mungesa e integrimit

Autoritetet zvicerane e marrin integrimin, ose mungesën e tij, shumë seriozisht.

Kjo përfshin ndjenjën e përgjegjësisë personale dhe financiare (që do të thotë të jesh i vetë-mjaftueshëm dhe të mos mbështetesh në asistencë sociale), respekt për vlerat zvicerane, si dhe aftësi në gjuhën e rajonit tuaj.

Nëse nuk përmbushni ndonjë nga këto kushte, atëherë qeveria mund të refuzojë të zgjasë vlefshmërinë e lejes suaj, përcjellë albinfo.ch.

Një tjetër skenar i mundshëm është që leja juaj mund të zvogëlohet, për shembull, nga më e larta (C) në një më të ulët (B).

Kryerja e krimit

Nëse shkelja juaj gjykohet mjaft serioze, atëherë mund të revokohet leja e punës.

Arsyeja këtu është e qartë: kjo sjellje tregon se ju nuk respektoni ligjin, rendin dhe vlerat e Zvicrës në përgjithësi.

Largimi nga vendi

Nëse keni një leje B dhe largoheni nga vendi për një periudhë të gjatë kohore, atëherë do të humbisni të drejtën për të punuar dhe jetuar këtu.

Në rast se do të ktheheni përfundimisht, leja nuk do të rivendoset automatikisht, do t’ju duhet të filloni procesin e aplikimit nga e para.

Nëse jeni mbajtës i një lejeje C dhe planifikoni të largoheni nga vendi për më shumë se gjashtë muaj (por jo më shumë se katër vjet), atëherë keni mundësinë ta vendosni lejen “në pritje”, shkruan thelocal.ch.

 

---