Gjermani: Bie numri i lejeve të ndërtimit, rriten çmimet e qirave

Numri i lejeve të ndërtimit në Gjermani ka shënuar një rënie të dukshme, sipas shifrave të publikuara nga Zyra Federale e Statistikave të vendit (Destatis).

Gjatë gjysmës së parë të vitit 2023 autoritetet gjermane të strehimit miratuan lejet për ndërtimin e 135,200 apartamenteve, që ishte 50,600 më pak leje ndërtimi të lëshuara gjatë së njëjtës periudhë të vitit 2022, shkruan DW.

Shifrat vetëm për muajin qershor treguan një rënie prej 28.5% me vetëm 21800 banesa të miratuara krahasuar me të njëjtin muaj të vitit të kaluar.

“Rritja e kostove të ndërtimit dhe kushtet gjithnjë e më të këqija të financimit ka të ngjarë të kenë kontribuar në rënien e projekteve të ndërtimit”, tha agjencia në një deklaratë, përcjell albinfo.ch.

Agjencia qeveritare theksoi se kjo ka të bëjë me lejet e ndërtimit për banesa në ndërtesa të reja dhe gjithashtu banesa të reja në ndërtesat ekzistuese.

Destatis vuri në dukje një rënie në lejet e ndërtimit për të gjitha llojet e ndërtesave.

Nga janari deri në qershor janë miratuar lejet e 111.500 banesave në ndërtesa të reja banimi, gati 31% më pak se në të njëjtën periudhë të vitit të kaluar.

Numri i lejeve të ndërtimit për shtëpitë njëfamiljare ra me 35,4%, ndërsa për banesat dyfamiljare, numri i banesave të miratuara kishte rënë me 53,4%, shkruan DW.

Rënia e numrave vjen mes thirrjeve nga firmat dhe disa politikanë që Berlini të ndërhyjë dhe të mbështesë industrinë përpara një takimi muajin e ardhshëm me kancelarin Olaf Scholz.

Ka pasur shenja paralajmëruese shqetësuese që vijnë nga sektori i pronave në Gjermani, me një numër të ndërtuesve të pronave që janë regjistruar për falimentim në javët e fundit.

“Bilanci për gjysmën e parë të 2023 tregon një pamje tepër të zymtë në ndërtimin e banesave”, tha Tim-Oliver Mueller, kreu i Federatës Gjermane të Industrisë së Ndërtimit, përcjell albinfo.ch.

Ministrja gjermane e Strehimit, Klara Geywitz, tha kohët e fundit se qeveria e koalicionit nuk do të arrijë objektivin e saj për të ndërtuar të paktën 400,000 apartamente të reja në vit.

Rritja e çmimeve të pasurive të paluajtshme dhe rritja e normave të interesit për kreditë e bëjnë blerjen e një shtëpie apo apartamenti të papërballueshme për shumë gjermanë.

Në shumë raste, opsionet e vetme të disponueshme janë shtëpitë e vjetra që kanë sisteme ngrohjeje të vjetëruara me lëndë djegëse fosile.

Cenueshmëria në sektorin e pasurive të paluajtshme është shfaqur edhe në SHBA dhe Kinë, shkruan DW.

---