Ambasada e Shqipërisë në Zvicër u apelon prindërve t’i dërgojnë fëmijët në shkollat shqipe

Me rastin e fillimit të vitit të ri shkollor

Këtë të martë ka nisur viti i ri shkollor i gjuhës shqipe edhe në Zvicër. Ambasada e Shqipërisë ka uruar për një vit të mbarë dhe të suksesshëm.

“Përpjekja dhe investimi juaj për gjuhën shqipe dhe arsimimin në shqip të fëmijëve shqiptarë në Zvicër është një mision fisnik dhe i shenjtë. Realizimi i këtij misioni është një ndër shërbimet më të mëdha për ardhmërinë tonë në breza, për ruajtjen e gjuhës dhe identitetit tonë kombëtar dhe përcjelljen tek brezat e rinj”, thuhet në urimin e ambasadës, përcjell albinfo.ch.

Tutje, nga ambasada shqiptare bëhet thirrje për prindërit që fëmijët e tyre t’i mësojnë në gjuhën shqipe.

“Ambasada e RSH në Zvicër inkurajon dhe u bën apel prindërve shqiptarë që t’i çojnë fëmijët e tyre në shkollat shqipe, mësuesve që të rrisin impenjimin maksimal në organizime dhe tërheqjen e sa më shumë nxënësve që të ndjekin mësimin shqip etj.”, thuhet nga ambasada, përcjell albinfo.ch.

---