Lajme

Presidenti rus reagon pas rrëzimit të aeroplanit, në të cilin gjendej Yevgeny Prigozhin

E enjte, 24 Gusht 2023 - 19:00 albinfo.ch

Presidenti i Rusisë, Vladimir Putin, ka reaguar lidhur me rrëzimin e aeroplanit që raportohet se gjendej udhëheqësi i Grupit Wagner, Yevgeny Prigozhin dhe nëntë të tjerë.

Reagimi i tij vjen 24 orë pas rrëzimit të aeroplanit, teksa sipas mediave ndërkombëtare, presidenti rus e përshkroi Prigozhinin si një “biznesmen të talentuar”, të cilin e njeh që nga viti 1990. Sipas tij, Rusia do të shqyrtojë se çfarë thonë hetuesit në lidhje me përplasjen, por detajet e mëtejshme mbi incidentin do të kërkojnë kohë, shkruan albinfo.ch.

Në anën tjetër, Mihailo Podolyak, këshilltari i presidentit ukrainas, Volodymyr Zelensky, ka deklaruar dje për Bild se vdekja e liderit të grupit mercenar rus Wagner, Yevgeny Prigozhin, ka qenë e paraparë pas rebelimit të tij kundër Kremlinit.

“Prigozhin ia ka nënshkruar vetes dënimin me vdekje në momentin që u ndal 2000 kilometra larg Moskës”, u shpreh ai.