Lajme

Policia e Londrës sulmohet nga hakerët

E diel, 27 Gusht 2023 - 19:40 albinfo.ch
Kystone

Policia Metropolitane e Londrës është goditur nga një sulm i madh kibernetik, gjë që ka çuar në hakimin e të dhënave të oficerëve dhe stafit të policisë më të madhe në Britani të Madhe. Mediat ndërkombëtare kanë raportuar se policia londineze ndodhet në një nivel mjaft të lartë gatishmërie, si pasojë e sulmit, shkruan albinfo.ch.

47 mijë pjesëtarët e kësaj force policore janë njoftuar për ekspozimin e mundshëm të fotografive, emrave dhe gradave të tyre. Mësohet se ky sulm ka ndodhur pasi kriminelët kibernetikë kanë mundur të infiltrojnë në sistemin e IT-së së një kompanie kontraktore që merrej me printimin e kartave dhe dokumenteve që u mundësojnë stafit hyrjen në ambientet e Policisë në mbarë kryeqytetin britanik.

Zyrtarët deklarojnë se kjo kompani e kontraktuar nga Policia Metropolitane kishte qasje tek emrat, gradat, fotografitë dhe nivelet e vetingut si dhe kodet e pagesave për oficerët dhe stafin policor.

Sipas njoftimit, kompania nuk ka pasur informacione personale, si adresat, numrat e telefonave apo detaje të tjera financiare.

Agjencia Kombëtare e Luftës kundër Krimit, NCA, e cila njihet ndryshe si FBI-ja britanike, është thirrur në ndihmë nga frika e përfshirjes në këtë histori dhe e përdorimit të këtyre të dhënave nga grupet terroriste apo ato kriminale.

Zyrtarët e Policisë vlerësojnë se kjo ndërhyrje në sistemin e sigurisë së IT-së “mund të shkaktojë një dëm të pallogaritshëm, nëse të dhënat kanë rënë në duart e gabuara”.

 

 Të tjera nga Lajme

Wermuth mund të kandidojë për mandatin e pestë në Parlament

 E-Diaspora

 Jeta në Zvicër