24 të burgosur në Liestal refuzuan të kthehen në qelitë e tyre

www.globaldetentionproject.org

Në burgun e Liestal, 24 të burgosur refuzonin të ktheheshin në qelitë e tyre, kryengritje kjo që zgjati tri orë.

Kjo ndodhi për shkak të një debati verbal mes të burgosurve dhe stafit të burgut.

Kryengritja ndodhi të hënën në burgun në Liestal, thotë Adrian Gaugler, zëdhënës i policisë së Bazelit. “Të burgosurit dhe stafi i burgut u grindën. Më pas, të burgosurit refuzuan të ktheheshin në qelitë e tyre”, thotë ai për SRF.

Pothuajse të gjithë morën pjesë. Ditën e kryengritjes në Liestal u burgosën 25 veta dhe në kryengritje morën pjesë 24 prej tyre.

Policia ka vendosur disa patrulla dhe ka ndërhyrë. Tri orë më vonë, në orën 19:30, rendi u rivendos, tha Gaugler.

“Askush nuk u lëndua. Sigurisht që nuk më kujtohet që diçka e tillë të ketë ndodhur ndonjëherë në këtë shkallë në Baselland. Jeta e përditshme në burg është e qetë, e kjo falë angazhimit profesional të mbikëqyrësve në terren. Edhe pse deri më tani nuk ka pasur kryengritje të të burgosurve, herë pas here ndodh që të burgosurit të lëndohen”, shkruan Andreas Schiermeier, zëdhënës i drejtorisë së sigurisë.

Nëse shikoni më nga afër shifrat, mund të shihni se vitet e fundit në burgjet e Bazelit ka pasur dukshëm më shumë vetëvrasje sesa në vitet e mëparshme. Që nga viti 2015, katër persona kanë vrarë veten në një nga katër burgjet. Më parë, nuk kishte pasur vetëvrasje në burg për 13 vjet, shkruan SRF.