Shkolla shqipe në Bavari, një fillim premtues

Bavaria numëron gjithsejtë 34 klasa dhe ka 32 mësimdhënës/e që një herë në javë mbajnë nga dy orë mësim plotësues në gjuhën shqipe. Mësimi mbahet në shkollat e rregullta gjermane.

Nisma për hapjen e mësimit plotësues në gjuhën shqipe, në Landin e Bavarisë, ishte një nismë e domosdoshme dhe mëse e nevojshme për mërgatën shqiptare, që jeton dhe vepron në Munih, përcjell albinfo.ch.

Nismëtarët e saj, për dallim nga organizatat dhe shoqatat tjera shqiptare në Bavari, kishin për qëllim parësor e të domosdoshëm, çështjen e ruajtjes së gjuhës amtare, kulturës kombëtare shqiptare dhe mësimin e historisë së kombit të tyre, në bashkëpunim me institucionet tona kombëtare e shtetërore të Republikës së Shqipërisë dhe të Kosovës.

Në vitin 2017 filloi mësimi në këtë land pasi u themelua edhe Lidhja e Arsimtarëve Shqiptarë për Bavari (LAPSH). U hapën shumë klasa, u pranuan mësimdhënës të rinj, u mbajtën seminare, manifestime dhe kuiz diturie! Donatorët kryesor, ishin dhe janë akoma edhe sot: Fondacioni “Besa”, entin social i Mynihut (Sozialreferat), shoqata gjermane “ Morgen e.V.” pa i harruar prindërit edhe donatorët tjerë, që jetojnë e veprojnë në Bavari. Kryesia e LAPSH-it, ndërtoi lidhje të ngushta me të gjitha institucionet përkatëse vendore. Gjatë kohës së pandemisë „Covid-19“, procesi mësimor u përballë me sfida të ndryshme, e cila jo vetëm që e kishte vështirësuar mbajtjen e mësimit të rregullt, po njëkohësisht kishte krijuar rrethana sfiduese për vetë kryesinë e LAPSH-it dhe të mësimdhënësve.

Prej atehere e deri më tani janë hapur mbi 15 klasë të reja dhe rrjeti i klasave është zgjeruar në të katër anët e Bavarisë: nga Rosenheim-i në jug e deri në Aschaffenburg në veri, e nga Passau në lindje e deri në Memmingen në perëndim.

Për momentin LAPSh Bavari numëron gjithsejtë 34 klasa në mbarë Republikën e Bavarisë dhe në mesin e saj ka 32 mësimdhënës/e që një herë në javë mbajnë nga 2 orë mësim plotësues në gjuhën shqipe. Mësimi mbahet në shkollat e rregullta gjermane dhe menaxhohet nga LAPSh-i, por është nën juridiksionin e ministrisë se kulturës dhe arsimit të landit te Bavarisë (Kultusministerium) dhe nën ombrellën e dy konsullatave në Mynih.

 

(Autori është kryetar i LAPSH për Bavari Milazim Ukaj)

 

 

---