Krahasim: Cili vend në Evropë ka tani normën më të ulët të lindjeve?

Numri i lindjeve në Evropë ka rënë në mënyrë dramatike vitet e fundit, sipas disa statistikave, por cilat vende kanë shënuar rënien më të madhe të natalitetit?

Lindjet në Evropë kanë arritur pikën e tyre më të ulët që nga vitet 1960, pasi vetëm 3.88 milionë foshnja kanë lindur krahasuar me dyfishin e rreth 60 vjet më parë, sipas zyrës statistikore të BE-së Eurostat, transmeton albinfo.ch.

Në periudhën 1961–2022, të gjitha vendet (shtetet anëtare të BE-së si dhe vendet e EFTA-s Zvicra, Norvegjia, Islanda dhe Lihtenshtajni) panë rënie të vazhdueshme të lindjeve.

Niveli më i lartë i regjistruar ishte 6.8 milionë në vitin 1964. Deri në vitin 2002, lindjet kishin rënë në 4.36 milionë, e ndjekur nga një rritje modeste në 4.68 milionë në vitin 2008 dhe një prirje e përgjithshme rënëse pas atij viti (me përjashtim të vitit 2021, gjatë pandemisë).

Normat më të larta të lindjeve në Francë

Mesatarisht, shkalla totale e lindjeve, numri mesatar i fëmijëve të lindur për jetën e çdo gruaje ishte 1.46 lindje të gjalla në vitin 2022.

Ndër vendet evropiane të analizuara, Franca kishte shkallën më të lartën, me 1.79, edhe pse Byroja kombëtare e statistikave raportoi në janar se lindjet në Francë ranë në vitin 2023 në numrin më të ulët vjetor që nga Lufta e Dytë Botërore, me një normë mesatare të lindjeve prej 1.68 fëmijë për çdo grua, shkruan thelocal.

Pasuan Rumania (1.71) dhe Bullgaria (1.65). Normat më të ulëta të lindshmërisë në vitin 2022 u regjistruan në Maltë (1.08), Spanjë (1.16) dhe Itali (1.24).

Vendet e tjera ishin disi në mes, me Suedinë që raportoi një normë lindshmërie prej 1.53, Austria 1.55, Gjermania 1.46, Zvicra 1.39. Në krahasim, shkalla e lindshmërisë së Italisë në vitin 1960 ishte 2.4, e Danimarkës 2.57 dhe e Austrisë 2.69.

Një normë e fertilitetit prej rreth 2.1 lindje të gjalla për grua konsiderohet se mban konstante numrin e popullsisë në vendet e zhvilluara pa migrim.

Vitet e fundit, popullsia e BE-së është ulur pas dekadash rritjeje, kryesisht për shkak të qindra mijëra vdekjeve të shkaktuara nga pandemia Covid-19. Komisioni aktual Evropian nisi në vitin 2021 një debat mbi shoqërinë e plakur të Evropës, duke sugjeruar hapa për pjesëmarrje më të lartë në tregun e punës, duke përfshirë më shumë barazi mes grave dhe burrave dhe jetë më të gjatë pune.

Në vende të tilla si Italia, ka pasur thirrje për të rritur mbështetjen financiare për ata me fëmijë të vegjël, ose masa për trajtimin e problemeve kronike të cilat dekurajojnë ose pengojnë italianët të krijojnë familje.

Por në Francë, plani i Presidentit Emmanuel Macron për të ringjallur shkallën e ngadaltë të lindjeve shkaktoi një protestë, me feministe dhe politikanë të majtë që e akuzuan atë se kërkon të kontrollojë trupat e grave.

Të kesh fëmijë më vonë në jetë

Në gjithë Evropën duket se shumë gra po zgjedhin të kenë fëmijën e tyre të parë në një moshë më të vonë se në të kaluarën, që do të thotë se mundësia e fëmijëve të tjerë është zvogëluar.

Mosha mesatare e grave që kishin fëmijën e tyre të parë në BE në vitin 2022 ishte 29.7 vjeç (krahasuar me 28.8 në vitin 2013), duke filluar nga 26.6 në Bullgari dhe 27 në Rumani, në 31.7 në Itali dhe 31.6 në Spanjë.

Eurostat vëren se ndërsa normat e fertilitetit për gratë nën 30 vjeç kanë rënë që nga viti 2001, ato për gratë e moshës 30 vjeç e lart janë rritur. Në vitin 2001, shkalla e fertilitetit për gratë e moshës 25-29 vjeç ishte më e larta në të gjitha grupmoshat. Në vitin 2022, ishte për 30-34-vjeçarët. Shkalla e fertilitetit për gratë e moshës 35 vjeç e lart është gjithashtu në rritje.

---