Pensioni i 13-të mund të financohet nga taksa e transaksioneve financiare

(KEYSTONE/Michael Buholzer)

Rritja e pensionit të “muajit të 13-të” mund të financohet përmes taksës së transaksioneve financiare, thotë Partia Qendrore e Zvicrës, e cila është në favor të një takse mbi transaksionet financiare për të financuar nismën e 13-të të pagesës së pensionit.

Kryetari i partisë, Gerhard Pfister, ka thënë se taksa e propozuar nga partia do të ishte “më e synuar” sesa një rritje në tatimin mbi vlerën e shtuar (TVSH), për shembull, transmeton albinfo.ch.

“Do të prekë kompanitë që kryejnë shumë transaksione financiare. Ajo gjithashtu ka avantazhin që nuk prek individët privatë”, ka thënë ai, shkruan Le Matin Dimanche.

Politikani nga Zugu thotë se është i hapur edhe për rritjen e TVSH-së apo kontributeve të punonjësve.

“Në këtë fazë, gjithçka është e mundur. Por duke menduar se mund të financojmë një pension të 13-të duke kursyer këtu dhe atje është një iluzion”, ka thënë ai.

Tutje, sipas tij, një pagesë shtesë e 13-të e pensionit shtetëror do t’u paguhet gjithashtu përfituesve të sigurimit të invaliditetit (AI).

“Kjo është pasojë e drejtpërdrejtë e vendimit të popullit. Të bësh ndryshe do të ishte diskriminim ndaj pensionistëve të AI”, tha ai.

Sipas një sondazhi të publikuar një javë më parë, 64% e zviceranëve janë në favor të vendosjes së një takse mbi transaksionet financiare për të financuar nismën e 13-të të pagesës së pensioneve. Pak më shumë se gjysma e të anketuarve (51%) ishin në favor të kontributeve më të larta federale nëpërmjet reduktimeve në buxhetin e ushtrisë zvicerane.