Dhuna në familje në Shqipëri: Nga fillimi i vitit, 202 të arrestuar dhe 570 raste të denoncuara

(KESTONE/Christof Schuerpf)

Statistikat e Policisë së Shqipërisë kanë vënë në dukje se vetëm katër muajt e parë të vitit 2024 në vend janë regjistruar 570 raste të dhunës në familje, me 610 autorë nga të cilët 202 janë e arrestuar.

Sipas raportimeve, pothuajse çdo ditë në Shqipëri një person arrestohet për dhunë në familje, ndërsa duke pasur parasysh dendësinë e popullsisë, qarku me numrin më të madh të denoncimeve për dhunë në familje është ai i Tiranës, i ndjekur nga ai i Durrësit, Fierit dhe Vlorës, shkruan TCH, transmeton albinfo.ch.

Në bazë të statistikave, situatë e njëjtë ka qenë edhe vitin e kaluar. Gjatë vitit 2023 janë evidentuar dhe trajtuar nga policia 5064 raste të dhunës dhe krimeve të tjera në marrëdhëniet familjare. Vetëm gjysma e tyre, konkretisht 2334 raste të dhunës dhe krimeve të tjera në marrëdhëniet familjare u çuan në prokurori, ndërsa janë arrestuar 699 persona gjatë gjithë vitit.

Gjatë vitit 2023 në Shqipëri, për shkak të marrëdhënieve familjare u vranë 9 gra dhe vajza, 3 burra dhe një foshnjë, teksa i lartë ka qenë dhe numri i urdhrave të mbrojtjes, ku ka pasur 2730 kërkesa dhe 150 raste kur urdhri i mbrojtjes është shkelur.