Stuhia diellore “ekstreme” gjeneron dritat veriore, përfshihet edhe Zvicra

X, sc: @meteosuisse

Dritat veriore ishin të dukshme në vende të ndryshme në Zvicër gjatë natës nga e premtja në të shtunën. Fenomeni ndodhi për shkak të stuhisë më të fortë diellore që nga viti 2003.

Dritat veriore u vërejten mbrëmjen e së premtes në Valais, afër Ravoire në komunën Martigny dhe në Chavannes-près-Renens në kantonin Vaud.

Ky fenomen natyror u vëzhgua gjithashtu në observatorin Winterthur Eschenberg. Observatori Hubelmatt në Lucern më herët njoftoi shfaqjen e mundshme të Dritave Veriore në qiellin zviceran midis mesnatës dhe agimit, transmeton albinfo.ch.

Për t’i parë ato rekomandohet të shkoni në një vend të errët dhe në një pikë të lartë me pamje të qartë nga veriu.

Stuhi e rrallë diellore

Një stuhi diellore me intensitet të rrallë që goditi Tokën të premten shpjegon shfaqjen e këtyre dritave veriore, të cilat janë jashtëzakonisht të rralla në gjerësinë tonë.

Aurorat formohen kur këto ndezje diellore, të përbëra nga grimca të ngarkuara, kryesisht elektrone dhe protone, hyjnë në atmosferën e Tokës, shkruan RTS. Këto përplasen me gazrat në atmosferë, kryesisht oksigjenin dhe azotin, duke çliruar energji dhe dritë.

Që aurorat polare të jenë të dukshme deri në Zvicër, erërat diellore duhet të jenë shumë të forta. Tashmë ditët e fundit, fenomene të tilla të lehta janë vërejtur në gjerësitë tona gjeografike.

Një stuhi gjeomagnetike e nivelit 5 në shkallën 5, një nivel i përshkruar si “ekstrem”, u vëzhgua në Tokë të premten në mbrëmje, njoftoi një agjenci amerikane.

Kjo stuhi është shkaktuar nga mbërritja në Tokë e një sërë nxjerrjesh masive koronale nga Dielli, tha Agjencia Amerikane e Vëzhgimit të Oqeanit dhe Atmosferës (NOAA).

Magnifiques aurores boréales cette nuit capturées par la webcam #MétéoSuisse du #Santis pic.twitter.com/lc60t8u45w

— MétéoSuisse (@meteosuisse) May 11, 2024