Problemi është në Kosovë, jo në Hungari

Ambasadori i Hungarisë në Kosovë, Lorant Balla tha se policia hungareze nuk mund të kontrollojë secilin metër të kufirit, prandaj fajtori, siç tha ai, gjendet në Kosovë

Edhe sonte qindra kosovarë e kanë lëshuar vendin duke ikur me autobus në drejtim të Beogradit me synim BE-në. Imigrantët kosovarë po kalojnë në Hungari, gati pa u “vërejtur” nga autoritetet e Budapestit, ndërsa ambasadori i këtij shteti në Kosovë, Lorant Balla tha se problemi nuk është në Hungari, por në Kosovës.

Balla ka thënë se autoritetet Hungareze të kufirit nuk kanë mundësi ta kontrollojnë secilin metër të kufirit, prandaj fajtori gjendet në Kosovë.

“Kufiri është me pyje, me përrua, toka pjellore, prandaj në çdo 100 metra ta fusim nga një polic, do të jenë 1000 policë. Ne nuk jemi në gjendje që t`i pengojmë. Nëse Kosova nuk e pengon, atëherë Hungaria si ta pengoj”, ka deklaruar aamasadori hungarez në Prishtinë, Lorant Balla.

Ai ka sugjeruar për autoritetet kosovare që të kontrollojnë linjat e autobusëve që transportojnë qytetarë drejt Serbisë.

Diplomati hungarez është ndjerë i shqetësuar në numrin e madh të kosovarëve që po kalojnë në Hungari. Ai tha se janë mbi 20 mijë kosovarë që kanë kaluar nëpër duart e autoriteteve hungareze, ndërsa kufirin Serbi-Hungari, siç tha ai, e kanë kaluar edhe shumë më shumë kosovarë.

“Me siguri shifra reale është më e lartë se numri i azilkërkuesve mund të themi që i bie 40 mijë -50 mijë” citon RTK ambasadorin Balla, sipas të cilit, këta kosovarë që po e kalojnë kufirin ilegalisht nuk do të mund t’i realizojnë synimet e veta.

“’Nëse jo 100 për qind, 99 për qind do të kthehen në Kosovë, nëse jo nesër pas një muaji pas dy muajve dhe si do të kthehen do të figurojnë në një listë që e ndalojnë hyrjen e tyre në Evropë për disa vite. Do të kenë një borxh se strehimoret nuk janë falas pastaj edhe transporti nuk është falas”, deklaroi ai.

Ndryshe, përfaqësuesit e institucioneve të Kosovës kanë marrë një iniciative për të dal në terren dhe për t’i bindur qytetarët që mos të emitojnë.

Në një komunikatë nga Presidenca e Kosovës, thuhet se presidentja Atifete Jahjaga dhe kryeministri Isa Mustafa, së bashku me bartësit e institucioneve përgjegjëse të Kosovës, biseduan për mënyrat e zgjidhjes së çështjes së migrimit ilegal, përmes vetëdijesimit të qytetarëve të Kosovës.