Qeveria e Kosovës përgjigjet: Pse nuk u takuan Albin Kurti dhe Edi Rama?

Kryeministri i Shqipërisë Edi Rama, në shënimin e 25 vjetorit të çlirimit të Kosovës po qëndron sot për vizitë në Kosovë.

Rama është takuar me presidenten e vendit, Vjosa Osmanin teksa po ashtu mori pjesë në konferencën ndërkombëtare të organizuar nga Lidhja Demokratike e Kosovës me temën “Rugova dhe perëndimi”.

Zëdhënësi i Qeverisë së Ksovës, Përparim Kryeziu është përgjigjur se pse kryeministri i Shqipërisë nuk do të takohet me atë të Kosovës.

Sipas tij, Rama po i takon ata me të cilët konsideron që ka nevojë t’i rregullojë raportet, transmeton albinfo.ch.

“Në anën tjetër, Kryeministri Kurti, Zyra e tij, e ka ftuar Kryeministrin Rama në aktivitetet që shënojnë 25-vjetorin e çlirimit të Kosovës më 12 qershor. Kryeministri Rama, përkatësisht Zyra e tij, na ka njoftuar që nuk do të mund të jetë i pranishëm me 12 qershor”, ka thënë ai për Klankosova.tv.

Tutje, ai ka deklaruar se Rama është i mirëseardhur që t’i bashkëngjitet aktiviteteve të agjendës shtetërore.

“Urojmë që vjen në Manifestimin e 146-të vjetorit të Lidhjes së Prizren, sepse Lidhja e Prizrenit nuk është vetëm e Kosovës”, ka shtuar tutje ai.