Oborret e shkollave në Prizren, parkingje për mërgimtarët

Komuna e Prizrenit ka hapur oborrin e gjimnazit “Gjon Buzuku” dhe të shkollës “Lidhja e Prizrenit” për parkimin e automjeteve të mërgimtarëve, shkruan albinfo.ch.

Drejtori i Shërbimeve Publike në Prizren, Çelë Lamaj, ka kërkuar nga qytetarët që të kenë mirëkuptim edhe në shfrytëzimin e parkingjeve të tjera.

“Për bashkatdhetarët janë vënë në dispozicion dy parkingje pa pagesë brenda qytetit, në gjimnazin “Gjon Buzuku” dhe SHFMU “Lidhja e Prizrenit”, tha Lamaj.

Ai kërkon mirëkuptim nga qytetarët e Prizrenit, të cilët e shfrytëzojnë më shumë se një ditë parkingun prapa Shtëpisë së Bardhë dhe parkingun përgjatë rrugës “Nuredin Shala”, që t’i tërheqin automjetet vullnetarisht në mënyrë që t’u mundësohet mërgimtarëve që gjatë sezonit të verës t’i shfrytëzojnë parkingjet në këto lokacione deri më 30 gusht 2024.

Komuna e Prizrenit është duke i bërë të gjitha përgatitjet për pritjen e mërgimtarëve gjatë pushimeve verore.

Blerim ÇOÇAJ