Kapet shqiptari me 4.5 kilogramë kokainë të fshehura në makinë

Ticino: Policët që kontrolluan automjetin, në veturë gjetën të fshehur rreth 4.5 kilogramë kokainë dhe disa mijëra euro para të gatshme

Siç njofton Prokuroria Publike, Policia Kantonale dhe Shërbimi Federal i Doganave dhe Mbrojtjes së Kufirit (EZW), më 13 korrik 2024 është arrestuar një shtetas shqiptar, 39-vjeçar, me banim në Shqipëri, transmeton albinfo.ch. Ai po mbahet i dyshuar për tregti me drogë.

I përmenduri po udhëtonte përmes Italisë për në Zvicër me një makinë me targa gjermane dhe u ndalua nga punonjësit e UDSC në kryqëzimin e autostradës Chiasso Brogeda, Kantoni Ticino, shkruan polizeiticker.ch. Kur grupi special i kontrolluesve të UDSC-së kontrolloi automjetin, në veturë gjetën të fshehur rreth 4.5 kilogramë kokainë dhe disa mijëra euro para të gatshme.

Akuza me të cilën ngarkohet 39-vjeçari është për një vepër të rëndë kundër Ligjit për Narkotikët.

Hetimet po koordinohen nga prokurori Alvaro Camponovo.

 

---