Kosovë: Arrestohet një serb nën dyshimet për krime lufte kundër popullsisë civile

Një person i nacionalitetit serb, me inicialet T.P., është arrestuar sot në Kosovë, nën dyshimin për kryerje të veprës penale ‘krimi i luftës kundër popullsisë civile’.

Lajmi është konfirmuar përmes një komunikate për media, ku thuhet se arrestimi është bërë nga hetuesit policorë në koordinim me Prokurorinë Speciale në Republikës së Kosovës, përcjell albinfo.ch.

“Hetuesit policorë nga Drejtoria për Hetimin e Krimeve të Luftës, në koordinim, bashkëpunim dhe me autorizim të prokurorit të Prokurorisë Speciale të Republikës së Kosovës, sot, më 12.09.2024, ka arrestuar të dyshuarin T.P., i nacionalitetit serb, për shkak të dyshimit se ka kryer veprën penale ‘krimi i luftës kundër popullsisë civile’, vepër kjo e sanksionuar me nenin 142 lidhur me nenin 22 të Ligjit Penal të  Republikës Socialiste Federative të Jugosllavisë si ligj në fuqi në kohën e kryerjes së veprës penale”, thuhet në njoftim.

Dyshohet se gjatë kohës së luftës në Kosovë, rreth muajit mars të vitit 1999, në Istog, ai ka kryer vepra të ndryshme penale, duke përfshirë plaçkitjen dhe shkatërrim të pasurisë së popullsisë civile.

Tutje bëhet e ditur se me urdhër të prokurorit të çështje, i pandehuri gjendet nën masën e arrestit dhe ndalimit policor, për t’u dërguar tek gjyqtari i Procedurës Paraprake brenda afatit ligjor.